هي ٻي عالمي جنگ دوران وچ ائٽلانٽڪ سمنڊ ۾ موجود بحري جنگي جهاز تان اڳوڻي آمريڪي صدر فرينڪلن ڊي رُوز ويلٽ ۽ برطانيائي وزيراعظم سرونٽسن چرچل طرفان جاري ڪيل اهو ٻه-طرفو پڌرنامو آهي ، جنهن ۾ جنگ بابت سهمتيءَ ڀريل مقصد بيان ڪيا ويا هُئا. هن پڌرنامي ۾ خوف ۽ لالچ کان ڇوٽڪاري ۽ اظهار ۽ مذهب جي آزادي تي زور ڏنو ويو هو، جن جي بُنياد تي اتحادي گڏجي جنگ ۾ حصو وٺندا. ان کان سواءِ خوداختياريءَ جي حق، آزاد ۽ جمهوري طريقي سان حڪومت سازي، معاشي تعاون، جهاز رانيءَ جي آزادي، تڪرارن ۾ طاقت جي استعمال کان پرهيز ۽ ٻي عالمي جنگ جي خاتمي تي بين الاقوامي سلامتيءَ جي حوالي سان عالمي سرشتي جي نئين جوڙجڪ وارن اصولن تي عمل درآمد بابت به پڪ پڪاڻي ڪئي وئي. مٿيان خيال، آزاديون ۽ سهمتيون اتحادين جي مُخالف جنگي اتحاد يعني ”محوري طاقتن“ جي سوچ جي بلڪل اُبتڙ هُيون. هن پڌرنامي اڳتي هلي ”گڏيل قومن جي اداري“ جي قيام لاءِ بُنيادي پنڌ ۽ پيچرا نروار ڪيا، جنهن جي نتيجي ۾ بين الاقوامي معاملن جي پر امن حل لاءِ دُنيا کي هڪ سگهارو پلئٽفارم مهيا ٿيو